08. febrúar 2010
Forseti tekur á móti eintaki af nýrri sögu Kaupfélags Skagfirðinga en stjórnarformaður Kaupfélagsins og kaupfélagsstjóri færðu forseta hana á Bessastöðum.
08. febrúar 2010
Forseti á fund með forráðamönnum ráðstefnunnar Driving Sustainability sem haldin hefur verið á Íslandi á undanförum árum en hún er helguð alþjóðlegri umfjöllun um umhverfisvænar samgöngur. Rætt var um þróun ráðstefnunnar, möguleika Íslendinga til að gera bílaflota sinn vistvænni og uppbyggingu umfjöllunar um þessi efni í öðrum löndum.
06. febrúar 2010
Forseti sækir Nýsveinahátíð Iðnaðarmannafélags í Reykjavík þar sem fjölmargir iðnsveinar voru heiðraðir fyrir góðan námsárangur og meisturum þeirra afhentar viðurkenningar. Einnig var tilkynnt um val á iðnaðarmanni ársins og var það Björgvin Tómasson orgelsmiður. Forseti flutti ávarp við atöfnina en einnig fluttu ræður Katrín Jakobsdóttir menntamálaráðherra og Vilhjálmur Þ. Vilhjálmsson forseti borgarstjórnar.
05. febrúar 2010
Forseti sækir frumsýningu Halaleikhópsins á verkinu Sjöundá - Svartfugl en það er byggt á verki Gunnars Gunnarssonar í nýrri leikgerð Ágústu Skúladóttur og Þorgeirs Tryggvasonar. Leikhópurinn samanstendur af ólíkum einstaklingum, fötluðum sem ófötluðum, og var hann stofnaður árið 1992 og hefur haft að markmiði að iðka leiklist fyrir alla. Meðal styrktaraðila leikhópsins eru Sjálfsbjörg og Öryrkjabandalag Íslands.
01. febrúar 2010
Forseti birtir kveðju vegna andláts Steingríms Hermannssonar fyrrverandi forsætisráðherra.
Kveðja.
31. janúar 2010
Forseti er viðstaddur leik Íslands og Póllands á Evrópumótinu í handbolta sem haldið er í Vín, heilsar upp á leikmenn að loknum sigri þeirra, er viðstaddur verðlaunaathöfn mótsins og ræðir við forystumenn handknattleikssambandsins og ÍSÍ sem einnig voru á þessum lokadegi mótsins. Þá var forseti viðstaddur úrslitaleik mótsins þar sem Frakkar og Króatar áttust við.
29. janúar 2010
Forseti hefur átt viðræður við fjölda áhrifamanna á alþjóðavettvangi, í fjármálalífi og efnahagsmálum á Alþjóða efnahagsþinginu í Davos. Þá hefur hann verið í ítarlegum viðtölum við fjölmiðla: BBC, bæði sjónvarp og útvarp, og sjónvarpsstöðvarnar CNN, CNBC, Bloomberg, Reuters og Al Jazeera, og var um að ræða heimsútsendingar þessara sjónvarpsstöðva. Þá hefur forseti rætt við blaðamenn Wall Street Journal, Times á Írlandi og fleiri prentmiðla.
Fréttatilkynning.
Meira
27. janúar 2010
Forseti hefur þegið boð Alþjóða efnahagsþingsins (World Economic Forum) um að sitja ársþing þess í Davos í Sviss sem haldið er í þessari viku. Þingið sækir fjöldi forystumanna ríkja víða að úr veröldinni, fjölmenn sveit áhrifamanna í fjármálum, atvinnulífi og fjölmiðlun, sem og margir stjórnendur viðskiptabanka og seðlabanka. Þingið er einn helsti vettvangur skoðanaskipta og stefnumótunar í efnahagsmálum og er haldið í Davos á hverju ári.
Fréttatilkynning.
Meira
21. janúar 2010
Forseti flytur lokaræðuna á Heimsþingi hreinnar orku (World Future Energy Summit) sem haldið er í Abu Dhabi.
Ræða forseta.
21. janúar 2010
Forseti á fund með forseta Maldíveyja, Mohamed Nasheed, í Abu Dhabi þar sem báðir sóttu Heimsþing hreinnar orku.
Fréttatilkynning.
Mynd.
Meira
20. janúar 2010
Forseti flytur á morgun, fimmtudaginn 21. janúar, lokaræðuna á Heimsþingi hreinnar orku (World Future Energy Summit) sem haldið er í Abu Dhabi. Heimsþingið sækir fjöldi forseta, forsætisráðherra, umhverfisráðherra og orkuráðherra víða að úr veröldinni auk vísindamanna, tæknimanna, sérfræðinga og forystumanna í atvinnulífi. Markmið þingsins er að vísa veginn í átt að byltingu í orkubúskap heimsins þar sem sólarorka, vindorka, jarðhiti, vatnsorka og aðrir hreinir orkugjafar yrðu ráðandi.
Fréttatilkynning.
Myndir.
Meira