Forseti sendir Hörpu Ósk Valgeirsdóttur skátahöfðingja og íslenskum skátum á alheimsmótinu í Suður-Kóreu hlýjar kveðjur. Í skeyti sínu lýsti forseti þeirri von að hópnum muni ganga vel að komast í öruggt skjól áður en yfirvofandi ofsaveður á mótssvæðinu ytra brestur á. Þá nefndi forseti að í þeim hremmingum sem þar hafa dunið yfir að undanförnu hafi skátar nýtt sína þjálfun og kunnáttu til hins ítrasta. Að lokum óskaði forseti þeim góðrar heimferðar.