Forseti flytur ávarp og opnar ljósmyndasýninguna „Samtal við Sigfús – Í fótspor Sigfúsar Eymundssonar“ í Þjóðminjasafninu. Að sýningunni stendur Einar Falur Ingólfsson ljósmyndari, sem tekur verk þessa frumherja íslenskrar ljósmyndunar og myndar frá sömu stöðum og hann gerði á 19.öld, eða nýtir sér þau hughrif sem staðurinn skapar.

Sýningin samanstendur af úrvali þessara samtalsverka Sigfúsar og Einars Fals, að hluta ný prent eftir glerplötum eldri ljósmyndarans en einnig valin frumprent frá 19. öld, þegar myndirnar voru teknar. Um er að ræða fágæta dýrgripi í eigu Ljósmyndasafns Íslands sem afar sjaldan sjást.

Samhliða sýningunni gefur Þjóðminjasafnið út bókina Aftur – Samtal við Sigfús, með rúmlega 130 ljósmyndum og texta eftir Einar Fal.