Guðni Th. Jóhannesson

Sjötti forseti lýðveldisins, Guðni Th. Jóhannesson, fæddist í Reykjavík 26. júní árið 1968. Hann er sonur hjónanna Margrétar Thorlacius, kennara og blaðamanns, og Jóhannesar Sæmundssonar, íþróttakennara og landsliðsþjálfara, sem lést árið 1983.

Guðni er kvæntur Elizu Reid og kynntust þau á námsárum sínum við Oxford-háskóla á Englandi. Eliza er frá Kanada og lauk prófgráðum í nútímasögu í Oxford og í alþjóðasamskiptum við Torontoháskóla. Guðni og Eliza hafa verið búsett hérlendis frá árinu 2003. Börn þeirra eru Duncan Tindur (f. 2007), Donald Gunnar (f. 2009), Sæþór Peter (f. 2011) og Edda Margrét (f. 2013). Guðni á dótturina Rut (f. 1994) með fyrri eiginkonu sinni, Elínu Haraldsdóttur, viðskiptafræðingi og listakonu.

Á árunum 2013-2016 var Guðni kennari í sagnfræði við Háskóla Íslands, lektor, dósent og síðast prófessor, skömmu áður en hann tók við embætti forseta Íslands. Áður var hann lektor við Háskólann í Reykjavík og stundakennari við Háskóla Íslands, Háskólann á Bifröst og University of London. Jafnframt vann hann um árabil við afleysingar á fréttastofu Ríkisútvarpsins. Guðni hefur skrifað fjölda sagnfræðirita, meðal annars um sögu þorskastríðanna, um forsetaembættið, um embættistíð Kristjáns Eldjárns forseta Íslands, ævisögu Gunnars Thoroddsens og bókina Óvinir ríkisins en tvær þær síðastnefndu voru tilnefndar til Íslensku bókmenntaverðlaunanna. Að auki hefur Guðni skrifað fjölda fræðigreina um sögu Íslands og samtíð og hefur hann hlotið ýmsar viðurkenningar fyrir fræðistörf sín. Árið 2017 var hann sæmdur nafnbót heiðursdoktors við Queen Mary University of London og árið 2024 hlaut hann sömu nafnbót við Háskólann í Oulu í Finnlandi.

Myndasyrpa frá forsetatíð Guðna Th. Jóhannessonar.

Vefsíða embættis forseta Íslands í tíð Guðna Th. Jóhannessonar.

Innsetningarræður

Áramótaávörp