Til hamingju með dag íslenskrar tungu, öllsömul! Íslenskan er frábært tungumál sem sennilega hefur aldrei verið notað af fleirum en nú og því skulum við fagna. Íslenskan tekur líka á sig ýmsar myndir, eins og sást svo vel í dag. Í tilefni dagsins eru komin út fjögur ný lög sem samin voru á íslensku af þekktu tónlistarfólki í samvinnu við ungmenni um allt land. Verkefnið nefnist Málæði og afraksturinn er frábær. Ég mæli með hlustun á lögin og leyfi mér að vekja athygli hér á einu þeirra, sem heitir Riddari kærleikans. GDRN flytur, en þennan einstaklega fallega texta ortu nemendur í grunnskólanum á Hofsósi, þær Dagmar Helga og Valgerður Rakel. Takk fyrir að breiða út kærleiksboðskapinn, stelpur!

Lagið má finna hér.

Í dag opnaði líka langþráð sýning á handritunum okkar í Eddu, húsi íslenskunnar. Ég hvet ykkur öll til að fara og skoða þessa einstöku dýrgripi og hlakka til að gera það sjálf. Svona lifir íslenskan áfram, bæði í handritunum og með ungu kynslóðinni.

Birtist fyrst á facebook-síðu forseta 16. nóvember 2024.